«Дешара оагӏонцарча гӏулакхий лаборатори» яха хьехархой яхь дӏахьоргья Магасе
Тов бетта 26-ча дийнахьа дӏаяхьа лерхӏ Магасерча таьрахьашца дувзаденнарех йолча академе «Дешара оагӏонцарча гӏулакхий лаборатори» яха хьехархой яхь (хакатон). Мехкарча дешара моттигашкара хьехархой, методисташ, иштта вузашкара, колледжашкара кхоана хьехархой хинна дӏаотта беза студенташ хургба цига дакъа лоацаш.
«Дешара оагӏонцарча гӏулакхех дувцаш моттиг хургья из. Доакъашхой тоабашта бекъабенна, хьехамчаша оагӏув хьаллоацаш, кердадараш юкъелоацаш, дешара оагӏонцара цхьацца декхараш кхоачашдеш хургба. Шоаш хьабаь болх гойтаргба цар цул тӏехьагӏа хьехамчашка. Дикагӏа йола проекташ дӏахо хьаллоацаш дикка йоаржае лерхӏ», - дийцар «Сердалога» цу оагӏонцарча мехкарча Министерствос.
Дакъа лаца дехар цхьана вӏашагӏъеллача тоабангара е шийга цхьаннегара чудала йиш я. Хакатона болх чакхбаьлча, массанена цу оагӏонцара сертификаташ лургда. Дакъа лаца ловш вар, укх моттиге дӏатӏаваьнна, дӏачӏоагӏвала веза: https://vk.cc/dӏPsO4
