Кхетам баларца къахьегарашта лаьрхӏа кхетаче дӏайихьар Магасе
Мехкарча дешара моттигашка къахьегараш гулбенна, кхетаче хилар Магасе. Дешаш болча кагирхошта нийса кхетам луш болх дӏахьош бола къахьегамхой бар цига вӏашагӏкхийттараш. Дешара моттигий кулгалхой гӏончаш бар дукхагӏа цига хиннараш.
Иштта цу балха юкъе дакъа лоацаш хилар психологаш, терроризм яхача зулама духьале лоаттаеча кхела доакъашхой. «Кхетаче йолаш дийцар къонабарашта юкъе терроризм яха зулам цадаржийтара тӏехьа лоаттабе безача балхах. Мехкарча ишколашка цу оагӏонцара болх дӏахьош кхоачашде дезарех, эггара лоархӏамегӏдарех дийцар кхетаче.
Ишкол тахан бераша духхьала дешаш йола моттиг хинна ӏац, дукхагӏа йола ха цар дӏахьош йола моттиг я из. Къаьстта ишколера дӏаболалу моллагӏча хӏаман никъ, цудухьа къонабарашца болх дӏахьош, чӏоагӏа фийла хила веза. Кагирхошта нийса кхетам балар, воча гӏулакхех лорабеш уж беркатеча наькъ тӏа бахар тахан лоархӏаме гӏулакх да», - дийцар «Сердалога» цу оагӏонцарча министерстве. Ишколашка берашца лоаттабеча балха йоккха терко е еза вай. Тахан уж къона болаш, вахара никъ бовза болалуча хана, дег чу чӏоагӏдаьр дӏахойодача хана накъадаргда царна.
