«ЦӀилеторгаш берий ловзорг дац» яха берий суртий яхь дӀайихьар Магасе
29.10.2024 09:48
Магасерча № 1 йолча ишколе дӀайихьар берий суртех йола «ЦӀилеторгаш берий ловзорг дац» яха яхьаш. Ишколан администраце, шахьарерча тӀахьожама болхлоша цхьана вӀашагӀбелла болх бар из. «Сердало» газетага из хоам бир Россе МЧС ГУ болхлоша.
ЦӀерцара гӀулакх мел чӀоагӀа лораде, фийла хила везаш да гойташ хилар хьалхарча классашкара бераш.
Къоаламашца, басарашца, маркерашца болх беш, шоашта из гӀулакх мишта гу довзийташ хилар бераш чуийнна. «ЦӀерцарча кхерамзлен хьалах лаьца шоашта хетар каьхата тӀа ӀотӀадиллар бераша. Гуш дар, вай бераш начӀал, лакха кхетам болаш долга»,- белгалдир МЧС болхло волча Тиймарзанаькъан Яхььяс.
