Бойла дисача берий фусамий бокъонех йола кхетаче хилар Магасе
Сага бокъонех вола викал волча бахархой тӏаийбеш ди хилар. Цига дийцар дар, да-нана доацаш дисача берий бокъонех, царна хьадоагӏача хӏаманца дувзаденнарех. Бахархой хаттараш доашхаш йола кхетаче дӏайихьараш бар сага бокъонех вола викал Цӏечой Ибрахӏим; лаьттан гӏулакхех йолча министерствон кулгалхочун гӏонча Къулбужанаькъан Хади; дешареи ӏилмани гӏулакхех йолча министерствон болхло Чаненаькъан Мадина.
«Иштта хьакимаш цхьана гулбенна дӏахьоча кхетаче моллагӏа кхоачамбоацараш къоастаде дикагӏа аьттув боал. 47 саг вар цу дийнахьа тӏаийцараш. Бахархоша эггара чӏоагӏагӏа тохкаш хиннарех дар бойла бисарашта йоагӏаш йолча фусамца дувзаденнараш, иштта ханнахьа из болх чакхбаргболаш кхоачашде дезараш, цӏеной сертификат хьаэцара тӏехьа малагӏа болх дӏабахьа беза», - дийцар «Сердалога» мехкарча УПЧ.
Цу дийнахьа хьатӏа мел венача сага хаттараш, царна къувлараш доашхаш болх дӏабихьар цун викала. Цо ше тӏахьожам беш, терко лоаттаеш дӏахьоргда цхьаццадараш. Да-нана доацаш дисача берашта чӏоагӏа лоархӏаме да шоашта ӏаьдалгара хьадоагӏаш долча хӏаманца дувзаденнараш боаггӏача боараме къоастадаь хилар.
