«Буллинг: багенна доал дара мах» яха лекци дӏайихьар Магасе
Бегвоахаш, тоӏаве, сизаваккха гӏерташ леладеча хӏамаша сага психологически оагӏонна боккха ӏоткъам белга хов вайна. Цох лаьца дувцаш, лекци яр Магасе дӏайихьар. Цига дийцар, кагирхоша из тайпара дола во, юхь йоагаеш дола хӏамаш теркал ца деш, нийсде ца хьожаш дита йиш йоацилгах. Кагирхой цхьанкхетара Цӏагӏа дӏайихьар из кхетаче «Эздий овла» яхача юкъарча болама доакъашхоша.
Из хӏама шоашта тӏалоаттадешшехь; йист ца хулаш, из ца хьоахадеш хилара бахьанех дийцар кхетаче; иштта хьехархоша, кагирхоша, даьша, ноаноша из во, ийрча гӏулакх даржаргдоацаш малагӏа болх лоаттабе беза дийцар.
Спикераш болаш дакъа лоацаш бар цу кхетаче психологаш, 10 шу совгӏа болх беш вола нейрологопед-дефектолог Арсамаканаькъан Альберт, гештальд-терапевт, дегӏа могашал меттаоттаеча моттига кулгалхо йола Балайнаькъан Хади. Цар массане, вахарера цхьацца масалаш хьадоаладеш, дийцар психологически оагӏонца низ тӏалоаттабаро сага вахаре ютача ларах, из хӏама тӏакхаьчарий оагӏув хьаллацарах, цхьаккха а тайпара из во чакхцадалийтарах.
«Кагирхошта юкъе эггара чӏоагӏагӏа даьржа дола хӏама да из тахан. Юххьанца из гучадаккхар, духьале яр да лоархӏаме.
Иштта йолча кхетаченаша боккха пайда боаржабу. Вай массане кхетаде деза, цхьайолча хана ханнахьа, доаггӏаш аьнна дош а сага гӏо деш, оагӏув хьаллоацаш хила йиш йолга», - белгалдир Арсамаканаькъан Альберта.
