Россе къамий меттай Денна хетаяь кхетаче дӏайихьар Магасе
«Къаман мотт лорабар: керттердараш, цу оагӏонцара болх» яха Миннаца вӏашагӏъелла кхетаче дӏайихьар Магасе. Цхьан истола гонахьа гулбенна дӏахьош хинна кхетаче Россе къамий меттай Денна хетаяь яр.
«Цу лоархӏамеча вӏашагӏкхетаре гулбелар йоазонхой, журналисташ, редактораш, иштта наьна метта хьал лорадара тӏехьа къахьегараш. Къаман метта лерхӏам дешара, культуран, медиа оагӏонашка лакха лакха хиларах дийцар кхетаче», - йоах тхогарча хоамо.
Технологей заманца наьна мотт цабайтарах, цун хьал эшацадалийтарах дувцаш, юкъедоаладе дезараш белгалдир къаман политиках йолча министерствон кулгалхочун гӏонча волча Пхьаранаькъан Асхьаба. Цо дийцар тахан дӏахьоча проектех.
Хӏаьта эггара лоархӏамегӏа йола моттиг дӏалоацаш я тха болхлочун Курскенаькъан Ибрахӏима гӏалгӏай метта онлайн дошлорг. Кепайоазон цӏен «Сердало» шеф-редактор волаш къахьегача, начӏал долча цо хьалхадаьккхар, бахархоша, къаьстта къонача тӏехьено, цунца болх бар мишта хила деза. Карарча хана из къахьегаш ва наьна метта «Яндекс. Таржамхо» яхача проекта тӏа.
Халкъа Гуллама кулгалхочун гӏонча волча Пхьаранаькъан Руслана белгалдир, наьна метта хьал лорадар эггара хьалха дезала юкъера долалулга. Да, нана да тахан цу хӏаман тӏахьожам беш, шоай дезалга къаман мотт ӏомабайта безараш.
