Магасе хургья, лаьрххӏача тӏема операце доакъашхой аллея
Гӏалгӏайчен столице тоаяь яьккхар керда дагалоаттама моттиг - лаьрххӏача тӏема операце Аллея. Кердача мемориала доазув да 170 метр; Горчхананаькъан ӏ. урамгара Коталон парке кхаччалца. Балхаш дӏахьош, гӏишлонхоша деррига из доазув тоадир, кердадаьккхар - цига ӏобиллар дика гӏашлой никъ, урам тӏа сердал ӏалашйир, бахархошта, хьаьшашта салаӏара лаьрхӏа гӏандаш оттадир, гонахьара моттиг баьццаръерзайир, цига гаьнаш, кӀотаргаш ӏоегӏар. Белггала бӏарг тӏаотташ я СВО бӏухой сийна хьалъяь наӏараш.
«Коталон парка моттиг дӏахо дӏаяхьарга дика товш хилар из болх. Дӏадахача шера хьайийллаяр из моттиг, Александровски бешара Даим йоагаш йола цӏи а ена, Волгоградера ена Коталон миха га дӏаегӏаяр. Из га дика дӏа а лета, хӏанз дегӏайоагӏаш я. Цу юххе хургда вай заман бӏухой - тахан мохк лорабеш латтарий сийленг. Цар денал, турпалал вайна массанена масал хила деза. Эггара халагӏча хана, шоай тӏема декхар кхоачашдара мутӏахьа болаш латт уж цига. Царех доаккхал деш я еррига Гӏалгӏайче. 2026 шера Россе Президента Путин Владимира хьакхайкадаьд; карардар Россе къамий цхьоагӏон Шу да, аьнна. Тахан тайп-тайпарча къамех бола нах, вӏаший уллув этта, шоай тӏема декхар кхоачашдеш ба. Из а да вай юкъара истори», - аьлар Гӏалгӏайчен кулгалхочо Келаматанаькъан Махьмуд-Ӏаьлас.
Кхоана лаьрххӏа хьаелларгья СВО Аллея, из хургья ерригача республикан лоархӏаме кхетаче. Цига дакъа лоацаш хургба республикан кулгалхой, тӏема ветеранаш, шахьара бахархой, кагирхой организацей викалаш. Уж сий деш хургба лаьрххӏача тӏема операце бӏухой.
