Магасе тохкаш да, ондаргаш юкъе болаш, даь къоал
Магасерча уголовни зуламхой лохачар баьча балха материалий кӏийлен тӏа хьадийллар банка чота тӏара ахча дахьарах дола гӏулакх. МВД шахьара тохкама даькъо из зулам дар дӏалаьрхӏар РФ УК 3 даькъа 158 статьяй «г» пунктаца, из да къоал дарах бехктокхаме озар.
«Тохкамхочо белгалдир, 14 шу даьнна Магасе ваха ши саг, Кулиева урамах латтача «ВАЗ-2110» автомобила наӏараш дӏакъайла йоацилга хайна, цу транспорта чубаьлар. Цхьаннена машина наӏара кисара банка карта корадир, из дар цу автомобила водитела фусам-наьна, из карта цар лочкъадир. Цул тӏехьагӏа, цар цу картах кхаь дийнахьа шахьара тикашкара хӏамаш ийцар. Из карта долча даьна цӏаьхха гучадаьлар ший чота тӏара ахча дӏакхухьаш хилар. Цу тайпара цун хинна зе да 12 эзар, 178 сом», - аьлар «Сердало» газетага Гӏалгӏайчен МВД зарбан болх лелабераша.
Хӏанз укх сахьате из гӏулакх тохкаш да. Къонача зуламхоша шоай бехк тӏаийцар, шоай да-нана тӏа а долаш. Бокъонаш лораераш царца болх дӏахьош ба.
