«Кванториум» яхача Магасерча технопарке, «инженерни каникулаш» дIайихьар
Республикерча берий «Кванториум» яхача технопарке «инженерни каникулаш» дIайихьар. Мехка тайп-тайпарча моттигашкара начIал дола дешархой гулбелар цига.
«Укх бетта 25-ча дийнахьа денз 7 шергара 17 шерга кхоачаш дола бераш тIаийцар цига, шин оагIонца болх дIахьош. 270 дешархочунца, Кванториумера вахар довзийташ, иштта гойтама балхаш дIакхухьаш, практически декхараш кхоачашдеш къахьийгар цига. Итт дийнахьа болх дIахьош таханарча технологешца дувзаденнараш дайзар берашта, иштта инженерий, программистий, конструкторий, Iилманхой балхацара кIоаргаленаш йовза аьттув хилар цар. «Элиас» яхача тематически ловзаре дIагойтар цар шоаш Iомадаьр.
Цхьан минота «Кванториума» вахарца дувзаденнача, ма хулла дукхагIча дешай маIанаш дIаала дезаш дар бераш. ЧIоагIа кадай, ше-ше белгалвала гIерташ кхестар уж.
Беррига болх дика чакхбаккха гIерташ къахьегарах доакъашхошта квантоинаш елар - технопарка валюта», - йоах тхога бенача хоамо. Латтача Iадатах, тIеххьарча дийнахьа шоаш яьха квантоинаш «Кванториума» хайтек-цехе хьаяьча цхьацца хIамаех хийцар бераша. «Ши смена, итташ гойтама балхаш, дог гIоздаьнна бераш, керда новкъостий, дукха керда хIамаш Iомадар - иштта хилар-кх «Кванториумера» аьтинга бутт.
Баркал хилда дакъа лоацаш мел хиннарашта! Беркатерча кердача кхетаченга хьежаш хургда вай!» - аьлар «Кванториума» администратор йолча Налганаькъан Мадинас.
