1,5 млрд мах бола ПНИ хьалъеш латт Магӏалбике
200 сага моттигаш луш йола психоневрологически интернат хьалъеш боахк тахан Магӏалбикерча 1-ча даькъ тӏа. «Сердалога» из хоам бир мехкадаь зарбан болх лелабераша. Россе къахьегамах йолча Министерствос хьаллоацаш, федеральни проектага гӏолла дӏахьош болх ба из.
«Таханарча дийнахьа мехка лоархӏамеча гӏулакхех да из психоневрологически интернат хьалъяр. Массахана тӏахьожам, терко эшарашта боккха аьттув луш моттиг хургья цох. Йиллача хана болх чакхбаккха гӏерташ, тӏатеӏӏа дӏахьош ба болх», - белгалдир вай Мехкадас.
Цхьаццадола балхаш кхоачашдаь баьннаб цига. Боаггӏача боараме тоаяь, эшаш мел бола кхоачам болаш моттиг хургья цох. Интернате тӏаийбергба дегӏаца психически лазараш дола, хӏара дийнахьа терко эша ха яха нах. Цига баха йиш хургья цар; иштта дарба деш, кхача лоаттабеш, кхерамах лорабеш хьожаргба царга.
