Магӏалбик-Шахьара ӏаьдало кхоачашду бахархой тайп-тайпара хьашташ
Магӏалбик-Шахьара кулгалхочо Боканаькъан Мухьмада нах тӏаэцаш ди дар, яхаш, хоам бу «Сердало» газетага цигарча мэре.
«15 совгӏа вахархо вера шахьара кулгалхо волча, шо-шоай дехараш дахьаш. Из кхетаче дӏахьош тайп-тайпара къамаьл хилар, цу юкъе Садови урамах бӏеха хиш дӏааха моттиг хьалъяр а долаш, иштта дийцар тишъеннача фусамашкара нах арабахарах, царна фусамаш яларах, дӏахо къоастадир урамашка баьде хилара хьал, кхыдола лоархӏаме хаттараш», - аьлар хоамо.
Цхьадола дехараш цу сахьате кхоачашдир. Дӏахо тахка дезараш шахьара кулгалхочо цу хаттарех йолча моттигашка дӏакхачийтад, царна нийса мах оттабергболаш, кхоачашдергдолаш.
Магӏалбика мэре белгалдир, шоай болхлоша даим нахаца къамаьл деш хилар. Шахьара ӏаьдал кийча да наьха хьашташ кхоачашде.
