Нувхаш дӏакхувсача йоага цӏераш совцае лаьрхӏа ба Магӏалбике
Магӏалбикера нувхаш дӏакхувса моттиг бахархой сатем боабаь йола дикка ха я. Цигара хьаухача кӏурах паргӏатта садаккха йиш йоацаш, хала кхийстар нах. Дукхача хана денз наха хьовзаме яьннача цу моттига хьал меттадоаладе лаьрхӏа арабаьлар мехка. Из доазув цӏендеш болх ба дӏаболабаьр. «Сердалога» из хоам бера ӏалама гӏулакхех йолча министерствера.
ООО «ЭКО ЛАЙФ» моттигерча оператора лаьрххӏа машинаш араяьха, автогрейдераш юкъейолаш, лостам беш латт цига. Ара боад эттача, прожекторашца болх дӏахохьош ба цига.
Магӏалбикерча администраце къахьегаш ба кхаьч-кхаьчача нувхий гувнаш ӏоувттадергдоацаш. Деррига гуш хургдолаш камераш оттаяьй цу моттиге, 24 сахьата тӏахьожам беш нах хургба.
Цу моттига тӏадолхаш хинна наькъаш цӏендеш баьхкар цига. Цӏи яьнна моттиг хуле, МЧС машинаш дӏатӏайохалургйолаш жагӏа тоссаш нийсбаьб никъ.
Деррига доазув цӏендеш, нувхий гувнаш дӏадоахаш къахьегаргда цу даькъ тӏа. ӏалама, экологен гӏулакхех йолча министерствос тӏахьожам беш; болх ба из тахан.
