Шахьара моттигаш кердайоах
23.03.2026 15:50
Магӏалбике дӏадоладаьд шахьара урамий куц тоадара дола балхаш. Цу юкъе МКУ говзанчаша нувхаш чутувса яьшкаш хувцаш лат. Уж хаттараш кхоачашде лаьрхӏар наха дехарах. Цо таро лу шахьар цӏена лелае.
«Карарча шера хьалхара керда контейнераш оттайир Осканаькъан С.С. урамах, цига шахьара бахархой дукхагӏа хул. Керда нувхашта йола яьшкаш оттаяро Магӏалбика куц хувцаргда, иштта из цӏена лоаттае новкъостал дергда. Кхыйола моттигаш а кердайоахаргья, нувхашта яьшкаш оттаеш, урамаш тоадеш», - аьлар «Сердало» газетага Магӏалбика шахьара администраце кулгалхочо Галай Мусас.
Доазош тоадар - из дац йоккхий гӏишлош хьалъеш хилар. Шахьара ӏаьдало тӏахьех кердаяьха моттигаш лораяра, Магӏалбик цӏена, хоза хилийтара.
