Шахьарерча наькъашкара кхерамзлен хьал лорадарах йола кхетаче дӏаяхьа гулбелар Магӏалбике
17.07.2026 11:51
Магӏалбике дӏайихьача кхетаче дийцар, наькъашкара хатараш ма хулла лаьгӏдеш болх лоаттабарах. Гулбеннараша белгалдир таханарча дийнахьа цу оагӏонцара кхерамзлен хьал малагӏа моттиг дӏалоацаш да.
«Къаьстта терко еш дийцар кхетаче геттара кхераме лоархӏаш йолча, каст-каста хатараш хулача моттигех. Ахкан денош хьаэтта, салоӏаш долча берашта терко, тӏахьожам лоаттабарах, къаьстта фийла хила безилгах дувцаш къамаьл дир цу оагӏонцарча болхлоша», - йоах «Сердалога» Магӏалбикерча мэрера кхаьчача хоамо.
Тахан мехкарча хьакимашта хьалхашка латтача керттерча декхарех да, наькъашкара хьал меттадоаладар. Вай ханага хьежжа хила беза дӏахьош бола болх.
