Йоал яла еза моттигаш гучаяхара дош дийцар Магӏалбике
Йоалаца дувзаденнарех дувцаш йола кхетаче дӏайихьар Магӏалбикерча администраце хьакимаша. Йоал йоахачар, къахьегама гӏулакхех болча Паччахьалкхен оагӏоно, иштта полице болхлоша дакъа лоацаш хилар кхетаче. Хӏама йохкаш йола моттигаш, йоалаца дувзаденнараш бокъоно дӏадеххача тайпара кхоачашдеш хила езилга белгалдир цига.
«Хӏама йохкара болх тахан ӏаьдало хьаоттадаьрашка хьежжа хила беза. Цу гӏулакха йоккха терко йир гулбеннараша. Къахьегаш болча наьха бокъонаш лораяр а, йоалаца дувзаденнараш а меттадоаладеш болх ба лоаттабе безар», - дийцар «Сердалога» шахьара администраце.
Цу оагӏонцара гӏулакхаш тоадара тӏехьа кхоачашде дезараш белгалдир кхетаче. Бизнесменашта хьалхадоаккхаргда из гӏулакх лерттӏа хилийтара тӏехьа фу лораде деза. Из беррига болх дӏабахьар чӏоагӏа лоархӏаме да шахьаре, цхьацца хӏама леладерий гӏулакх боаггӏача боараме хургдолаш.
