Магӏалбике «Турпалхочун Парта» хьайийллар СВО бӏухочун Ӏалбаканаькъан Ӏаддал-Ӏазита сийна
Магӏалбикерча №5 йолча ишколе лаьрххӏа хьайийллар «Турпалхочун Парта»; цу ишколе деша ваьгӏача, лаьрххӏача тӏема операцена юкъе веннача бӏухочун Ӏалбаканаькъан Мусай Ӏаддал-Ӏазитах болча дагалоаттама.
Цун сий деш, цу дийнахьа цига баьхкар бӏухочун гаргара нах, хьехархой, ишкола дешархой. Кхетаче иштта дакъа лоацаш бар «Даьхен лорабой» ганза моттигерча филиала, шахьара администраце, республикан Юкъарлон палата, Афганистана ветераний Союза, СВО ветераний Ассоциаце викалаш, иштта хӏанз тӏема мугӏарашка латта лаьрххӏача операце бӏухой.
«Турпалхочун Парта - из дешара, мехкагадоаккхачун проект я, бӏухой сий дара, цар денал лархӏара, шоай Даьхе бахьан бейнарех дагалоаттам лелабара белгало я. Дешархой истола тӏа латт Ӏалбаканаькъан Ӏаддал-Ӏазита сурт, биографи, тӏема совгӏаташ тӏадола йоазон лист. Цу парта тӏа вагӏа бокъо йолаш хургва ишкола дикагӏа вола дешархо.
Лаьрххӏа йола кхетаче дӏахьош, йист ца хулача минотаца дагавехар вай мехкахо. Тӏема ветеранаша кхайкарал дир дешархошка, тӏема декхара лерхӏам бовзийташ долча дешашца.
Хьайийлла парта хургья кхувш боагӏача ноахалашта Ӏалбаканаькъан Ӏаддал-Ӏазит дагавохийташ, цун лакха бехктокхам, Даьхе езаш хилар царна масала хургда даим.
