Цӏихеза аьшкапхьар даькъалавийцар Магӏалбике
Металлургий Ди дездеш хиларца, вай мехкара цӏихеза аьшкапхьар Аьгенаькъан Гӏумкечун Султан даькъалавийцар Магӏалбикерча «Цаӏ йолча Россе» оагӏон хьалха латтача Йовлой Ӏусмана. Ший гӏулакхе дуккхача шерашка денз бехктокхе къахьегаш хьавоагӏача Султана доккха баркал кхайкадир цу дийнахьа.
«Цу оагӏонцара говзал лакха хиларал совгӏа, ше хьаеш йола хӏара хӏама тӏехдика чӏоагӏал йолаш хилийта гӏерт Султан. Иштта хьинар дола, шоаш ӏомадаь гӏулакх боаггӏача боараме кхоачашдеш хьабоагӏа нах массанахьа эшаш, лоархӏаш хиннаб. Хам бе безаш саг ва Султан», - аьлар Йовлой Ӏусмана «Сердалога».
Аьшкапхьоарал деш бола болх, тхьоврача хана денз, лакха лоархӏаш хиннаб мехка, цхьа моллагӏча сага караерзалуш говзал яц из. Из болх дикка ӏомабаьраша тӏехьа тӏабоагӏача къонабарашта дӏахьехьаш, тӏехьенгара тӏехьенга кхоачаш хьадахьаш лоархӏаме гӏулакх хиннад.
