Магӏалбике аргӏанара рейд йир мах беча моттигашка
Магӏалбике аргӏанара хьехама болх дӏабихьар, шоай доалахьара хӏама леладерий балхага хьожаш. Шахьара администраце экономически даькъа болхлоша Гӏалгӏайче гӏолла йолча Россе УФНС викалашца, Россе МВД «Малгобекский» МО даькъ тӏарча участковеца цхьана тӏахьожама болх дӏабихьар, мах беш йолча моттигашкара хьал тохкаш. Уж хилар хьалха хиннача «Беркат» яхача базара даькъ тӏа, яхаш, дийцар «Сердало» газетага Магӏалбика шахьара администраце зарбан болх лелабераша.
Уж цига бахар бахьан дар, шоай доалахьара хӏама леладеш болча наха, шоаш предпринимателаш е юридически нах хилара тӏехьа регистраци яьйий хар. Лаьрххӏа ше деш дола хӏама чӏоагӏдар - из духхьал каьхаташ дахара деш дац, из эшаш да моллагӏа йола бизнес лелаяра хьал чӏоагӏдара. Цо таро лу паччахьалкхен оагӏорахьара новкъостал лоаттаде, иштта коммерсанта бокъонаш лораю. Цудухьа хӏара предприниматель кхетаде дезаш ва, законо дӏадехача тайпара из хилар, хьалхарча аргӏагӏа шийна эшаш хилара деш долга.
Рейд дӏахьош, тӏахьожаш хиннараша царна хьалхадаьккхар де дезар, царца къамаьл хилар балха хьал дувцаш. Комиссе доакъашхоша ма дарра довзийтар йоала оагӏонца дӏаязваь латта везаш хилар, бизнес бокъонаша дӏадехар кхоачашдеш хила езилга.
Тхоца къамаьл даьчо белгала ма дарра, къайлагӏа лелабу болх гуча - боаккхаш йола шахьара рейдаш дӏахо а дӏахьоргья.
