Магӏалбике денала урок хилар, СВО ветерана дакъа а лоацаш
Магӏалбикерча №16 йолча юкъерча ишколе денала урок елар, цига дакъа лоацаш бар лаьрххӏача операце ветеран Албохчанаькъан Жабраил, «Даьхен лорабой» ганза гӏалгӏай филиала вахара дешашца бувзабенна болх лелабу Коазой Хьамид. Цига кхетаче йолаш, берашта хьаьшаша дийцар Даьхенцара безам совбаккхарах, деналах, майралах.
СВО ветерана берашта дийцар ший эскарерча балха говзалах, тӏема мугӏарашка нийсденнарех, иштта тӏем тӏа шоайла вошал леладарах. Бераш а геттара терко тӏайохийташ дар цу гӏулакхашта, цар хеттар мишта ӏомаде деза тӏема гӏулакх, мишта накъадоал тӏема мугӏарашка латтача бӏухошта бераша язду каьхаташ, яхаш.
«Кхетаче дӏахьош берашта накъадаьлар Даьхенцара безам лорабара, граждански бехктокхам хилара, тӏема гӏулакх лархӏара даькъ тӏа даь хьехар. Цу тайпара кхетаченаш накъайоал кхувш йоагӏача тӏехьенна; истори довзийтача, из лоархӏаш леладеча, Даьхе лораеш латтарий денал, майрал довзийтача», - аьлар «Сердало» газетага «Даьхен лорабой» ганзе.
Вахара дешаех бола болх лелабеча Коазой Хьамида къаьгга довзийтар берашта кхолламах, дешарах, патриотически проектех лаьца дола керттера хаттараш. Уж чудоагӏаш йола кхетаченаш ганзо каст-каста вӏашагӏйохкаш а дӏахьош а я. Цо белгалдир, безам бараш цу кхетаче дакъа лаца, цига шоай начӏал гойта таро йолаш болга.
