Магӏалбике граждански оборонах командан-штаба ӏомабалар дӏадихьар
Магӏалбике граждански оборона ӏомаяра командан-штаба ӏомабалар хилар. Кхетаче дӏахьош хьежар доал деча даькъ тӏа доккхий, унзара хьалаш юхатохара мел кийча ба, иштта граждански оборона тӏема хьале дӏаяхьа эттача фу карагӏдоал.
«ӏомавалар шин даькъа дийкъа дӏадихьар. Юххьанца, боахама кулгалхой гулбелар чоалханеча хьала комиссе кхетаче, дӏахо дӏабахьа безача балхах лаьца дийцар цар. Цул тӏехьагӏа, цар шоай гӏулакхашца хьагойтар, «Чоалхане хьал» этта моттиг хилча шоаш мел кийча ба. ӏомалуш ЕДДС говзанчаша, кхыча сихача гӏулакхий викалаша шоай болх чӏоагӏача графиках дӏабихьар, моттигашка эшаш мел бола низ тӏаэзар, гӏулакх доаржадеш», - аьлар «Сердало» газетага Магӏалбик-Шахьара администраце зарбан болх лелабераша.
Шахьара администраце кулгалхочо Боканаькъан Мухьмада, цу балха мах оттабеш белгалдир, шоаш хьалхашка мел оттадаь хинна декхараш кхоачашдаь хилар, бакъда цхьайола моттигаш дика йовзаш цахилар а хоалуш дар. Уж юстардахара бола болх а кастлуш дӏахьоргба.
