Россе Турпалах Боканаькъан Мустафайх бола дагалоаттам чӏоагӏбир Магӏалбике
Магӏалбикерча №3 йолча ишколе тӏема операцена юкъе вахар хаьдача Боканаькъан Мустафайна лаьрхӏа «Турпала Парта» хьайийллар. Из хоам «Сердалога» бир «Даьхен лорабой» яхача ганза зарбан болх лелабераша.
«Лакха майрал, денал гойташ тӏема декхараш кхоачашдеш лаьттача Боканаькъан Мустафайна Россе Турпал яха цӏи елар. Цун сийна хетаяьча кхетаче гулбелар хьакимаш, турпала цӏагӏара нах, ишколера хьехархой, дешархой.
«Даьхен лорабой» яхача ганза болхлочо Коазой Хьамида доккха баркал аьлар денал, яхь, майрал дола воӏ кхеваьча даьна, нанна. Иштта кхетаче хьоахадир, турпала бераш шоай даь никъ бовзаш, цун цӏи дагалоаттаеш ураоттабарах», - йоах тхогарча хоам тӏа. «Турпала Парт» хьаделлар цу сага деналах, майралах бизза хинна никъ бовзийтара тӏехьа лоархӏаме да», - дийцар тха газетага.
