Магӏалбика кхален наькъаш, берашта кхераме хургдоацаш, тоадеш латт
Бераш чудолча моттигашта юхерча наькъий кхерамзлен хьал тоадара тӏехьа, къахьегаш ба тахан Магӏалбика кхале. Ишколе даха арадаьннача берашта паргӏата хилийта дӏахьош ба из болх. Цу гӏулакха лаьрхӏа арабаьнна, тохкам беш хилар ГО, ЧС, кхален администраце болхлой. Берий бешамашта, ишколашта юхера дешархошта дехьабувла къоастаяьча моттигий хьал, наькъашта юкъе басарашца къоастам бар, иштта цу оагӏонцара бокъонаш белгалъеш йола гӏармаш массанахьа латтий хьожаш хилар уж.
«Дешара шу хьатӏаоттарга хьежжа, бераш дехьадувла дезача моттигий хьал боаггӏача боараме, цхьаццадараш кердадаьха хила деза. Инаркъе, Дола-Коа, Даби-Юрта, Кердача Реданте, Соагӏапча, Южне гӏолла гобоаккхаш хилар из гӏулакх тахка араяьнна тоаба. Къаьстта терко еш ба дешара моттигашта юхерча доазонашта. Белгалде деза, Республикан лоархӏаш долча машиний наькъашка наха дехьабувла къоастаяьча моттигий хьал лораде дезар наькъий гӏулакхех йола Министерство йолга. Цу оагӏонцарча болхлоша тоадергда цар хьал боаггӏача боараме», - дийцар «Сердалога» Магӏалбика кхален администраце.
Наькъашкарча кхерамзленца дувзаденнараш тоадар, къаьстта бераш лелача моттигий хьал цхьаккха кхоачамбоацар доацаш хилийтар, хьакимашта хьалхашкарча керттерча декхарех да тахан. ГИБДД болхлошца бувзам лоаттабеш, боаггӏача боараме терко е езаш гӏулакх да из. Бераш хӏара денна ишколе, берий беша ухаш дола наькъаш лертӏа, паргӏатта лела йиш йолаш, наькъашкара бокъонаш йовзийташ йола гӏармаш латташ хила деза.
