Спортах йола чемпионат дӀайихьар МагӀалбика кхале
Къам мехкахдаьккха 81 шу дизара хетаяь «Вайнаьха сий, низ» яха спорта тайп-тайпарча оагӀонех йола чемпионат дӀайихьар Йоккхача Ачалкхе.
Из хоам «Сердалога» бир МагӀалбика кхален администраце. Кхален моттигашкара толашагӀа бола спортсменаш гулбеннабар цига. Шоай бӀаргашта из дайнадеце а, мехкахбаьхача даьша лайнар, хийрача мехка текхар мел дега Ӏоткъам беш, унзара хиннад кхетадеш бар кагирхой.
Чемпионат вӀашагӀъеллараш бар пауэрлифтингах йола Чопанаькъан Руслан хьалха латта къаман ассоциаци; МагӀалбика кхален спортахи туризмахи йола Овшанаькъан Мухьмад хьалха латта комитет. Штангаца Ӏохувшаш, вижа уллаш штанга ийеш, цхьан кулгаца ийеш, иштта кхыдолча оагӀонашца шоай низ гойташ бар спортсменаш.
«Кагирхой спорта тӀахьехаш, пауэрлифтинг йоаржаеш, толашагӀа бола атлеташ гучабоахаш, дӀахьош яр чемпионат. Котбаьннарашта, дикагӀбарашта дипломаш, майдилгаш, совгӀаташ луш дӀайихьар из йоккха кхетаче»,- дийцар тха газетага спорта оагӀон болхлоша.
