Бахархошта токах тӏалаттача декхарах дийцар Магӏалбика кхале
Магӏалбика кхален администрацена кулгал деча Къоастой Ӏаддал-Хьамида кхетаче дӏайихьар, «Ингушэнергосбыта» оагӏон хьалха латтача Доврбиканаькъан Илезаца. Цу оагӏонца дувзаденнарех, иштта токах тӏалатта декхар хьагулдара балхах дийцар хьакимаша.
«Муниципалитета, тока оагӏон моттига юкъера бувзам чӏоагӏбеча каьхата кулг яздир кхетаче. Магӏалбика кхаленна чуйоагӏаш йолча юртий администрацешцара болх дикка чӏоагӏбарах дийцар цига. Къаьстта терко йир, токах хьаӏайна декхар бахархоша ханнахьа дӏатергдолаш къахьегара. Кхален доазон тӏа бахача наха, ток боаггӏача боараме лоаттаяра тӏехьа, эггара хьалхарча оагӏонца теркалде дезараш белгалдир кхетаче», - йоах «Сердалога» Магӏалбика кхален администрацера бенача хоамо.
Магӏалбика кхален хьакимашта доккха баркал аьлар тока оагӏонцарча моттига кулгалхочо декхар хьагулдара тӏехьа къахьегаш хиларах. Кхален кулгалхочо белгалдир, из болх дӏахойодача хана кхы а дикагӏа чӏоагӏбеш дӏабахьа лерхӏилга.
