«БАРС» яхача оагӏон доакъош вӏашагӏтохара балхах дийцар Магӏалбика кхале
Магӏалбика кхален администраце дӏайихьача кхетаче дийцар, «БАРС» (Мехка тӏема армейски кхоачам) оагӏонца дувзаденнарех. Кхален администраце кулгалхочун декхараш кхоачашдеш волча Къоастой Руслана дӏахьош хиннача кхетаче дакъа лоацаш бар юрташкарча администрацешкара кулгалхой, тӏема комиссариата болхлой, иштта кхыбола болхлой а. «Тӏема комиссара цу кхетаче дийцар эшшача кийчабарий гӏулакхах, карарча хана хьалхашка латтача декхарех, тӏема декхараш кхоачашде вахарах, паччахьалкхенгара цу наха хьадоагӏача хӏамах, иштта кхыдарех а.
Къаьстта терко еш дийцар бахархошца цу оагӏонца дувзаденнараш довзийташ болх лоаттабарах. Администрацешкарча кулгалхошта тӏадиллар, «БАРС» яхача оагӏон юкъе хилара гӏулакх бахархошта ма дарра дӏадовзийта, ӏаьдало цу наха малагӏа гӏо ду хьалхадаккха, аьнна», - йоах «Сердалога» цу моттигера кхаьчача хоамо.
Республикан чухьарча кхерамзлен хьалаца дувзаденнараш лорадара тӏехьа лоархӏаме да «БАРС» моттигерча тоабашта юкъе хилар. Цу наьха керттерча декхарех хургда мехкара лоархӏаме йола моттигаш лораяр, иштта ӏаьдала болхлошта цу оагӏонца дувзаденнарашта тӏахьожам лоаттабара тӏехьа гӏо дар.
