Культуран оагӏонцарча моттигий кхерамзлен хьалах дийцар Магӏалбика кхале
Культуран моттигашкара терроризм яхача доккхача зулама духьалара кхерамзлен хьал малагӏача боараме да дувцаш, кхетаче дӏайихьар Магӏалбика кхален администраце. Цу оагӏонцара болхло Галай Исроапил вар кхетачен керттера спикер.
«Цига дакъа лоацаш бар юрташкарча культуран Цӏеной кулгалхой. Галай Исроапила хьалхадаьккхар, терроризм яхача зулама духьалара кхерамзлен хьал боаггӏача боараме хила дезилга, массайолча моттигашка. Иштта белгалдир моллагӏа тешаме ца хета хӏама зийча, дагадоаца хатар эттача, эггара хьалхарча оагӏонца фу де деза, мишта хила веза», - дийцар «Сердалога» Магӏалбика кхален КДЦ.
Юрташкара культуран Цӏенош массахана дукха адам чулатташ, бахархой гуллуш йола, къонача тӏехьен къаман ӏадаташ хьехаш, нийсагӏдар хьалхадоахаш йола моттигаш я. Цунга хьежжа цу моттигашкара кхерамзлен хьалаца дувзаденнараш, цхьаккха кхоачамбоацараш доацаш, боаггӏача боараме хила деза.
