Харцар кхерам болча культуран Цӏеной хьал тохкаш хилар Магӏалбика кхале
Заьзгакъонгий-Юртарча, Аьккхий-Юртарча культуран Цӏеной хьал тахка арабаьлар Магӏалбика кхале. Тоае езарех я, аьнна, белгалъяьча моттигий гӏулакх мишта латт хьожаш болх бар из.
«Культуран гӏулакхех йолча министерствон кулгалхочун гӏонча Малсаганаькъан Хьажбикар, Магӏалбика кхален администраце кулгалхочун гӏонча йола Иленаькъан Зейнап, кхааш ийдара духьала къовсам лоаттабарах йолча комиссе секретарь Овшанаькъан Муса, гӏишлон балхашта тӏахьожам лоаттабарах болча оагӏон керттера болхло Цисканаькъан Расул юкъе волаш, кхел яр из гӏулакх тахка араяьннар», - дийцар «Сердалога» кхален администраце.
Гӏишлой хьал таханарча дийнахьа мишта латт, малагӏа кхоачамбоацараш да хьежар уж нах. Культуран Цӏеной гӏишлой хьал кхы а чӏоагӏагӏа талхаргдоацаш, ма хулла сихагӏа кхоачашде дезараш белгалдир из деррига тахка арабаьннараша.
