Магӏалбика кхале дӏахьош я газа тӏахьажара рейдаш
Гӏалгӏайчен Магӏалбика кхален Дола-Коа газаца дувзаденна хьал миштад хьожаш, из лелаярах дола декхар хьадехаш, аргӏанара болх дӏабихьар. Цу балха дакъа лоацаш ба газа болхлой, иштта кхален администрацен кулгалхочун гӏонча Къоастой Руслан.
«Рейд дӏахьош газ мел йоагаяьй, декхар мел да, цӏагӏара газаца леладу гӏирсаш малагӏча хьале да хьож. Нагахьа санна кхоачамбоацараш гучадаьнна моттиг нийслойя, царца лаьрххӏа бола болх дӏахьу, иштта хьалхадоаккх газах дола декхар ший ханнахьа дӏадала дезилга. Цу тайпара кхетаченаш дӏаяхьар Магӏалбика кхаленна администрацен хӏара деннара болх ба, цо таро лу декхар лаьгӏде, газ лелаяра даькъе кхерамзлен ӏалашо е», - аьлар «Сердало» газетага Магӏалбика кхален администраце зарбан-болх лелабераша.
Кхален администраци соцаш яц, цхьа болам дӏабахьар тӏа. Декхар дӏалой, газа гӏирсаш нийса леладой хьажара болх дӏахо дӏахьоргболаш ба. Цу балха чудоагӏаш; говзанчаш, кхален кулгалхой викалаш гӏоргба Магӏалбика доал деча даькъ тӏарча кхыйолча юрташка.
