СВО доакъашхошца, цар дезалашца кхетаче хилар Магӏалбика кхале
СВО доакъашхошца, иштта тӏема аренашка вахар хаьдача бӏухой цӏагӏарча нахаца кхетаче дӏахьош хилар Магӏалбика кхален администраци. Даьхен гӏулакха арабаьннарий вахарера кхоачамбоацараш тахкара, цар цхьацца хаттараш дашхара тӏехьа дӏахьош болх бар из.
Кхетаче дакъа лоацаш бар Магӏалбика кхален администрацена кулгал ду Къоастой ӏаддал-Хьамид, шахьара администраце кулгалхо Галай Муса, «Даьхен лорабой» яхача моттигерча ганза филиала кулгал ду Оздой Муслим, Мехкадаь администраце доакъашхо Йовлой Мухьмад, СВО ветераний Ассоциацена хьалха латта Саккхаланаькъан Муса, иштта тӏема комиссариата болхлой.
«Кхетаче дийцар Даьхе лорае арабаьннарашта, цар дезалашта, хьакимашта юкъе массахана бувзам хила безилга. Таханарча дийнахьа эггара керттердарех дола хаттараш доашхаш хилар гулбеннараш.
Белгалдир, тӏема операце ветеранашта боаггӏача боараме дарба лоаттаде дезилга, тӏема аренашка вахар хаьдача бӏухой цӏагӏарча наьха оагӏув хьаллоацаш, психологически оагӏонцара новкъостал лоаттадеш, санаторе гӏоргболаш вӏаштӏехьдоаккхаш хила безилга. Къаьстта йоккха терко еш дийцар коммунальни оагӏонца царна эшаш дола гӏо лоаттадарах, хӏара денна цар вахаре нийслуш дола кхоачамбоацараш юстарадахарах», - хоам бу «Сердалога» Магӏалбика кхален администраце.
Хьакимашцара кхетаче боаггӏача боараме чакхъяьлар ала йиш я тахан. Цига мел хинна хаттараш доашхаш, болх дӏабихьар хьакимаша. Хӏара моттига ше-ший аргӏагӏа цар кхоачашде дезараш боаггӏача боараме ӏалаьмате чехка меттадоаладе аьнна тӏадиллар. Магӏалбика кхален администраце кулгалхочо, шахьара дас, «Даьхен лорабой» яхача ганза болхлоша тӏахьожам, терко лоаттаеш дӏахьоргба из лоархӏаме болх.
