Физкультурникий Денна хетаяь, футбола яхьаш хилар Магӏалбике
Физкультурникий Денна хетаяь яхьаш дӏайихьар Магӏалбике. Кердача Реданте футболах дола ловзараш хилар. Кхален юрташкара ялх тоаба яр коталонга кхача гӏерташ хиннараш. Спорта хетадаь бӏарчча цӏай хилар цох.
«Яхьаш дӏахьош хиннар физически культурах, спортах йола Магӏалбикера Комитет яр. Ше-ше котвала гӏерташ, шоай мел йола говзал ураоттаяь, къахьийгар футболисташа. Белгалде деза, иштта йолча кхетаченаша къонабарашта юкъера бувзам, барт чӏоагӏбелга. Толашагӏа барашта майдилгаш, грамоташ луш дӏадийрзар из гӏулакх», - дийцар «Сердалога» кхален администраце.
Яхье дакъа лоацаш мел хиннарашта, баркал аьлар хьалхалаьттараша. Вай къонача тӏехьен юкъе доаржаде дезаш, царна пайда беш гӏулакх да из. Толамга кхачара тӏехьа хьинаре къахьега даькъалабийцар яхьашка дакъа лоацаш хиннараш.
