ИнгГУ лорий институте толашагӏа бола къона хирургаш белгалбир
Гӏалгӏай паччахьалкхен университета лорий институте XV хирургически олимпида хилар. Академика Перамельман И.М. цӏерах йолча Ерригача Россе хирургех йолча студенчески олимпиада Къилбаседа Кавказа бӏалага кийчо еш бола болх хилар цох. Олимпиаде гулбеннабар шоай гӏулакхаца лакха говзал, начӏал дола студенташ. Бокъонца саг эттӏаваь болх дӏахьош боахкаш санна, дӏаяхар яхьаш.
«Хӏара тоабанца 15 саг волаш, пхи тоаба яр дакъа лоацаш хиннараш. Индера тоаба а яр цига дикка белгалйоалаш. Таханарча хирургецара лоархӏамедараш гойташ бар доакъашхой. Хӏаьта тӏахьожама болх дӏахьош хинна лораш, хьехархой деррига теркалдеш бар», - дийцар «Сердалога» ИнгГУ зарбан болх лелабераша.
Иштта йола олимпиадаш кхоана лораш хинна наха дарба де отта безача студенташта боккха пайда беш хул. Тоабанца болх бе хар чӏоагӏа лоархӏаме да хирург волча сага. Кастта Къилбаседа Кавказа эггара чӏоагӏагӏа йолча тоабашца болх дӏахьош, шоай университет дӏайовзийта езаш ба студенташ.
