Бахархой тӀаийбу ди хилар унахцӀенон министерстве
УнахцӀенон гӀулакхех йолча министерствон хьалхалаттача Ӏалбаканаькъан Зарас бахархой тӀаийбу ди дӀадихьар. Из хоам «Сердалога» бир цигара зарбан болх лелабераша. Министра белгалдечох, иштта дӀакхухьача кхетаченашка гӀолла дикагӀа довз наьха хьашташ, кхоачамбоацараш. Укх наькъа итт саг вар министерстве тайп-тайпара хаттараш дахьаш тӀавенараш.
«Иштта кхетаченаш дӀакхахьар лоархӀаме да тха балхаца. ХьатӀаухачарна юкъера дукхагӀбараш боаггӀача боараме хӀама дӀахьалха ца даккхарах, нийса дӀа ца аларах, шоай малагӀа никъ харжа беза ца ховш, лелаш хул. Тхона лоархӀаме да хӀара сага эшар, къувлар фуд тахкар, хӀаране хаттар боаггӀача боараме дашха хьож тхо», - дийцар министерствон хьалха латтача Ӏалбаканаькъан Зарас.
Хьалхадоаккх, моллагӀа хаттар ийца министерстве дӀатӀаваха йиш йола денош хӀара беттацара тӀехьара шинара ди да. ДӀатӀаводачо хьалххе укх номерах телефон дӀатеха, дӀаязвайта веза ше: 8 (8732) 22-20-90; е, укх адресах дӀатӀаваха, дӀаязвайта веза: Наьсаре, МутаӀаланаькъан цӀерах бола урам, № 37.
