«Даьхе бахьан тӏом баьб цар!» яха гойтам хьабийллар мехкарча МКЖР
Даьхен лорабой Денна хетабаь «Даьхе бахьан тӏом баьб цар» яха гойтам хьабийллар мехкахбаьхарий Мемориальни моттиге. Тайп-тайпарча ханашка мохк лорабеш, тӏагӏертарий наькъаш тедаш лаьттарий майралах, деналах дола истори дийндеш кхетаче яр из.
«Хьалхарча дунен тӏем тӏа, 1941-1945-ча шерашка лаьттача Сийлахь-боккхача Даьймехка тӏем тӏа, иштта таханарча тӏема операце моттигашка лакха майрал гойташ лаьттача турпалий тӏема, вахара наькъах дийцар цига. Моастагӏаша лаьрхӏар дохадеш духьаллаьттача къаман деналах бизза болча къонгий сурташ дар хьокха оттадаьраш», - дийцар «Сердалога» гойтам дӏахьош хиннараша.
Белгалде деза, исторе лоархӏаме моттиг дӏалаьца болча турпалий тӏема, вахара никъ бовзийташ йола кхетаченаш тахан къонабарашта къаьстта лоархӏаме йолга. Вай цӏаккха а йицъе йиш йоаца цӏераш я уж Даьхен исторе.
Гойтаме хьабаьхкарашта довзаргда цу оагӏонцара лоархӏамедараш, моастагӏчун хийттар чакх ца доалийташ, духьале яьча майрача къонгий истори.
