«Кинон бийса» яхача боламга гӏолла, «PRO Кино» викторина дӏайихьар МКЖР
Российски кинон Ди дездара хетабаьча «Кинон бийса» яхача боламга гӏолла, мехкахбаьхарий Мемориальни моттиге «PRO Кино» яха викторина дӏаяхьа гулбелар бе-бе ханаш йола нах.
«Кинематографи езаш, йовзаш бараш вӏашагӏкхийтар зале, царна юкъе бар боккхийбараш санна дешархой а. «Доцентура», «Аьсала бӏарилгаш», «Кӏийлен кӏезигагӏдар» яха тоабаш яр, ше-ше белгалъяла гӏерташ хиннараш. Советски киногара ӏоболабенна, доазол арахьарча моттигий, российски кинош дагадоха дезаш хилар доакъашхой. Хаттараш аттачарех дацар, хӏаьта котало «Доцентура» яхача тоабанга кхаьчар», - йоах «Сердалога» МКЖР бенача хоамо.
Цу кхетачен спонсорашта баркал аьлар кхетаче дӏахьош хиннараша. Иштта доккха баркал кхайкадир «Матрица» кинотеатра, котбаьннарашта кино баха билеташ даларах, сертификата хьисапе совгӏат деннарашта.
Баркал оалаш къамаьл дир цига «Нейростарт» проект йоаржаяьча, хьакхеллача хьаькъалца болх беш йолча Марзбиканаькъан Маккийна. ӏомабала аьттув луш долча цо хьаденнача сертификаташка гӏолла, Aӏ-технологешца дувзаденнараш довзаргда къонабарашта, царех дикка пайда эцаргба.
