Мехктохкама музее, культуран болхлочун Ди долаш, гойтам хьабийллар
Гӏалгӏай паччахьалкхен, Малсаганаькъан Т.Х. цӏерагӏча мехктохкама музее культуран болхлочун Ди долаш, тематически гойтам хьабийллар. Из хетабаь ба, республикан дин тӏехьале лораерашта, искусство дегӏайоалаеш къахьегаш болча наха, иштта къаман исторически дагалоаттам лелаберашта.
«Гойтаме оттаяьй музея ганзера тамашийна хӏамаш. Къаьстта хьажа баьхкарий безам тӏабодаш дар архивни сурташ, цар тӏа го йиш яр Гӏалгӏайчен культура дегӏайоагӏача ханара керттера моттигаш. Цар довзийтар искусства къаьнарча вахара кадраш, дӏадахача шерашкара гойтамаш, цӏайшкара кхетаченаш, из республикан истори хинна дӏаэттад.
Укхаза иштта го йиш яр къаьнарча йоазонхой балхаш, цар вахарера сурташ.
Гойтаме белгалду, музейшка, библиотекашка къахьегарий болх лоархӏаме хилар, цар хӏара денна шоай къахьегамца культуран белггала дакъа юкъедахьаш хилар»,- аьлар «Сердало» газетага гойтам вӏашагӏбеллараша.
Къаьстта терко тӏайохийт ноахалашта, кагирхошта кхетам балара балха. Гойтамо тӏахьех республикан культуран вахара оагӏонаш лелаераш дикагӏа бовзара, Гӏалгӏайчен таханара вахар вӏашагӏдолларий къахьегама мах оттабара.
