Гӏалгӏайчен МВД йоккха вас хилар, эпсар Сапарӏаланаькъан Батыр валарах
Гӏалгӏай Республике гӏолла йолча Россе МВД болхлоша, кулгалхоша, хала хеташ, тӏаэц, наькъа инспектор Сапарӏаланаькъан Батыр ший балха декхараш кхоачашдеш валар, цар кодам бу цун гаргарча нахага.
«Из даим вусаргва тха дегашка, ший болх дика беш вола, Даьхен хьашташ кхоачашдеш вола болхло санна», - аьлар цунца болх баьча наха. ГИБДД болхло валарах хоам бир тахан «Сердало» газетага.
Гӏалгӏайче гӏолла йолча Россе МВД газетага баьча хоамах, полице воккхагӏа вола лейтенант Сапарӏаланаькъан Батыр болх бе волавелар 15 шу хьалха - 2011 шера саькура бетта 28-ча дийнахьа. Дукха къахьийгачул тӏехьагӏа, Гӏалгӏай Республике гӏолла йолча МВД амарах, из ГИБДД ДПС къаьсттача бӏун чувоагӏаш хилар. Укхаза болх бир цо, ший тӏеххьарча кӏимарса бетта 19 балха денга кхаччалца.
Цун дукха балха тӏа денна совгӏаташ дар 2012 шера ГӏР МВД ВОГ амарах, республикан Ди долаш, кхерамзлен дика ӏалашо ярах, совгӏат делар цунна.
Руслана виӏий Батыра вахар айхха бувзам болаш дар дезалца. Из ший даьца вахар, 2023 шера нана енначул тӏехьагӏа эшаш дола новкъостал даьна лоаттадеш. 39 шу даьнна полицейски саг йоалаянза вар. Дала гешт долда цунна, Дала къахетам болба цох.
