Гӏалгӏайчен Къаман библиотеке дийцар экстремизма духьалара хаттараш
Янданаькъан Жамалда цӏерагӏча къаман библиотеке «Экстремизмах, терроризмах кагирхой лорабар» яха бокъоний сахьат дӏадихьар. Из болх вӏашагӏбеллар яр бокъон хоамий наха юкъера центр. Кхетаче дӏахьош хилара бахьан дар, кагирхошта хьалхадаккхар бокъонаш йовзаш хилар, харц наькъ тӏа варгвоацаш сага ха дезар фуд.
Цига дакъа лоацаш хилар Шолжера дукхача оагӏоний дешара колледжа студенташ, библиотека массаханара дешархой, болхлой. Из болх вӏашагӏбеллараша берашта кийчдир кхерам болаш моттиг нийсъелча де дезар хойташ дола лаьрххӏа кулгал.
«Кхетаче хьаеллаш, ПЦПИ кулгалхочо Чагиева Залинас дийцар, кагирхой нийсача наькъ тӏа бахара керттерча декхарех, дӏахо де лерхӏачох. Кхетаче дӏахьош гойтар видеоматериалаш, царга гӏолла довзийтар бокъоний сахьат яхача тема керттера хаттараш», - аьлар «Сердало» газетага ГӏР НБ зарбан болх лелабераша.
Ийрча гӏулакхаш леладар юхатохара эггара лоархӏамегӏа дола хаттараш дийцар ГӏР МВД терроризма духьала къовсам лоаттабеча Центра болхлочо Меданаькъан А., РФ МВД Шолжа кхале гӀолла йолча полице МО кулгалхочо Фролов С., иштта РФ МВД Шолжа кхале гӀолла йолча МО ОПДН кулгалхочо Боканаькъан Р.
Керттера терко тӀаяхийтар терроризмаца къовсам лоаттабара бокъоний оагӀонна. Кхетаче дӀахьош хиннараша белгалдир, экстремизм йоаржаяра болх лелабераш, цу гӀозара юкъебаьннараш бехктокхаме ца озаш бусаргбац.
Цига иштта дийцар тайп-тайпарча вахара бувзамашка гӀолла кагирхой Ӏехабеш, уж цу ийрчача хьала юкъебаха гӀерташ воча наха леладеш дола гӏулакхаш. Из къамаьл дӀадихьар шоай безаме хаттараш луш, цаховр кагирхошта хьалхадоаккхаш.
