ГӏалгӀайчен Къаман библиотеке, «Литературан ГӏалгӀайче» яха журнал кхаьчад
Янданаькъан Жамалда цӀерагӀча Къаман библиотека ганзе 2025 шерара шоллагӀа, кхоалагӀа номераш «Литературан ГӏалгӀайче» («Литературная Ингушетия») яха журнал кхаьчад. Из лоархӀаш а наха юкъе дешаш а дола культуран-сердалон, литературан-исбахьален журнал лоархӀаме моттиг дӀалоацаш да гӀалгӀай дош дегӀадоаладара даькъ тӀа. Тӏеххьара араяьннача номераш тӀа го йиш я классически, гӀалгӀай литературан мах бараш, уж довш дац хана йӀоахал, цар керда низ чуболийт вай къонача ноахала, иштта цар тӀа го йиш я укх заман кхоллам, таханара гӀалгӀай проза, поэзи, публицистика.
«Проза» даькъ тӀа, литературан кердадарех да Ӏарчакханаькъан Сале романа дакъа «Цӏадахкар» («Возвращение»), иштта Матенаькъан Илеза повесть «Малав бехке?» («Кто виноват?)».
«Поэзе даькъ тӀа гӀадвугаш я начӀал долча поэтий байташ. Царех массехк сийрдагӀа, къонагӀа бола автораш ба Татренаькъан Исроапил, Дугенаькъан Мухьмад, Налганаькъан Илез. Таржамхошта терко тӀаяхийтар могаду Гӏазданаькъан Аьсета баьча балхо. Из да Есенин Сергея, «Письмо к матери» («Наьнага яздаь каьхат)» яхача байта даь таржам, иштта укх заман гӀалгӀай поэта Боканаькъан Гӏапура «Кусочек сахара» (Шекара бӀалг»).
«Пьеса даькъ тӀа (№2) юкъейоагӀа, Ӏарчакханаькъан Сале шиъ лоацца пьеса («Сибрера цӀермашинаш сиха лел», «Котало»); иштта Албохчанаькъан Зейнапа («Тийшаболх») яха пьеса. «Юбилейш» яхача даькъ тӀа я Ӏарчакханаькъан С. язъяь юбилейш йолча Гаьгенаькъан Г.А. (№2), Оздой И.А., Угурчанаькъан А-Г.Ш.(№3) хетаяь статьяш», - аьлар «Сердало» газетага ГӏалгӀайчен керттерча библиотеке.
Библиотека болхлоша хьалхадаьккхар, тӀакхоачаш хилар эггара халагӀа гӀалгӀай къаманга дена 1944 шу. Кастлуш иштта дӀахьоргда гӀалгӀай метта хетадаь итт ди. Цунна хетаяь кхетаченаш, гойтамаш, урокаш, лекцеш дӀахьош; барашта Къаман библиотеке керда «Литературан ГӏалгӀайче» яха журнал хилар хьалхадоаккх, уж еррига темаш цу тӀа йолаш я.
Журнал мах болаш да хьехархошта, царна из накъадаргда классал арахьара урокаш дӀаяхьара, иштта культуран болхлошта а цу тӀара хьаэца хӀама да; гойтамаш, кхетаченаш дӀахьоча хана. Из эшаш да гӏалгӀай къаман истори, мотт, литература кӀоаргагӀа довза безам болчарна.
