Наьсарен Московски урамцара нах дукхагӏа тӏалатта моттиг тоаеш латт
Наьсаре чакхдоалаш да юкъарлон доазув тоадара Московски урам тӏа дӏахьош дола балхаш. Из лоархӏаме проект кхоачашъеш я, «Шахьара дика хьалаш» яхача къаман проекта чуйоагӏаш. Из лаьрхӏа я салоӏа моттигаш ӏалашъяра.
«Таханарча денга кхоачаш, керда кӏийле ӏойиллай, сердал лоаттаяра эшар деш да. Дӏахо зӏамагӏа дола архитектурни балхаш дергда, доазув баьццардерзадеш болх дӏахьоргба. Цу балхага хьежар шахьара администраце кулгалхо Оздой Руслан. Цо декхар тӏадиллар, бийсанара сердал оттаяр вӏаштӏардаь цӏенош латтача коашка.
Доазув тоадара балхашца цхьана, хин ӏалашо яра Цаӏ волча операторо дӏахо а къаьнара хин турбаш хувцаш латт. Уж балхаш цхьана дӏахьош хиларо таро лу бахархошта коммунальни даькъ тӏара хьал тешшаме хилийта», - аьлар «Сердало» газетага Наьсарен-Шахьара администраце.
Московски урам тӏа дукха нах бах, гонахьа дукха вӏаштӏардаь цӏенош а да. Из доазув тоадарга наха сатувса дукха ха яр.
Уж еррига кхетаченаш чакхъяьнначул тӏехьагӏа, Наьсарен бахархой, хьаьший таро хургья кердаяьккха из моттиг го, из бокъонца йола шахьара хозал хургья.
