Наьсаре кийчбелар, кердача дешара шерá лостамца накъабаха
01.09.2024 16:58
Хӏара денна лостам беш ба Наьсарен коммунальни боахама болхлой, бакъда тахан боккхача безамца баьб цар шоай болх. Къаьстта из хоалуш дар дешара урхалленаш йолча моттигашка, яхаш, дийцар «Сердало» газетага шахьара кулгалхоша.
Дешара моттигаш йолча даькъ тӀа къаьстта лостам баьб. Техника хиннай цига никъ хица булаш, цӀенбеш. Машиний боккха никъ меттел, гӀашлой наькъаш а, цӀендаь, кийчдаьд берашта. Болхлоша кулгашца къахьегаш кийчо яьй массайолча гаьнашта, кӀотаргашта кӀалха. Лоацца аьлча кулгашца а техникаца а шоашта могар даьд, цӀено еш.
Цу тайпара совгӀат дир коммунальни боахама къахьегамхоша Ӏилмаш довза, дешар тӀа къахьега лаьрхӀа боагӀарашта.
