Наьсарера моттигаш тоаеш бола болх дӏахо дӏахьош ба
Укх шера, тӏадоагӏача шера шахьара моттигий куц тоадеш къахьегаргда Наьсаре. Из хоам «Сердалога» бир мэре.
«2027-ча шера куц тоаде деза моттигаш къоастаеча хоржамашка 12 эзар совгӏа вахархочо дакъа лаьцад тахан. Россе Президента Путин Владимира йоаржаяйтача шахьара моттигаш тоаярах йолча къаман проектага гӏолла, хоржам беш ба карарча хана. Цу программага гӏолла; хӏара денна тоалуш, хозагӏа хулаш латт вай шахьара моттигаш», - йоах тхога кхаьчача хоама тӏа.
Бахархой аьттув ба Мутаӏаланаькъан цӏерах болча урамера гӏашлой наькъа гонахьара моттигаш, Малсаганаькъан Кӏарцхала цӏерах йолча сквера, 105-ча оагӏон Нови оалача урама моттигаш тоаярах йола проекташ харжа. Хӏара денна дукха адам гуллуш йола моттигаш я уж ерригаш. 2027-ча шера тоае еза моттигашта юкъе я Левобережни оала урам, Московски 41 (МКД) урамера сквер. Белгалде деза, шахьара моттигаш наха паргӏатагӏа, хозагӏа хилийта гӏерташ, тахан боккха болх дӏахьош къахьегилга.
