Хоржамашка кийча хилара мах оттабир Наьсаре
Россе Паччахьалкхен Думан, Халкъа Гуллама хоржамашка кийчо еш ба Наьсаре. Шахьара да волча Оздой Руслана кхетаче дӏайихьар, 22 хоржамий моттига хьал тохкаш. Моттигерча избиркома кулгалхо волча Аькхенаькъан Мухьмад-Башира дӏабихьача балхах доклад йийшар цига.
«Къаьстта терко йир хоржамашта тӏадолхача наькъий хьала, иштта токаца, генераторашца, кхерамзленца дувзаденнарашта. Дегӏа могашал эшаеннарашта из гӏулакх аттача даккхарах дийцар. Цу гӏулакха бехктокхаме барашта тӏадиллар массанахьа хьожаш, цхьаккха кхоачамбоацараш дий тохкаш, болх дӏахьо аьнна», - йоах «Сердалога» Наьсарерча администрацера бенача хоамо.
Шахьара дас Оздой Руслана белгалдир моллагӏа кхоачамбоацараш цу сахьате тоаде дезилга.
Администраце декхарех да хоржамаш боаггӏача боараме, цхьаккха гӏалатло, новкъарло йоацаш дӏахьоргдолаш дерриганена лертӏа кийчо яр. Кхадж тасса хьавоагӏача вахархочунна духьале еш, цхьаккха хӏама хила йиш яц.
