Машин кхестаеш лийнна 18 шерга кхачанза вола вахархо дӏалаьцар полице
Наьсарерча Кхоартой цӏерах болча ураме кораш баьддаь «Лада Гранта» яха машин зийра полице болхлоша. Лоаллаш вагӏачунга машин соцае, аьнна, сигнал техар цар; бакъда вож газа тӏа ког тоӏабаь, машин дӏаэккхийта, къайлавала хьежар. Полице болхлоша из дӏа ца вахийта лаьрхӏа, шоай машин тӏехьахаьхкар цунна, хӏаьта вож светофорага ца хьожаш, наькъашкара бокъонаш лораяр доацаш, наькъ тӏа лелача машинашта боккха кхерам боаржабеш, духьалйоагӏача машинах хьокхалуш, мух санна водар.
«Цхьаккха тайпара леладе йиш йоаца кхераме гӏулакх дар наькъ тӏа цо кхостадаьр. Урагӏа массехказа герз техачул тӏехьагӏа а из ца сецача, цун машина чархех техар полице. Цхьа чарх ийккха, тӏера хьамча дӏадахачул тӏехьагӏа кхы а кӏеззига дӏаховаха, наьха коанаӏарга юхасецар зуламхо», - йоах «Сердалога» МВД беча хоамо. Машин лоаллаш ваьгӏар Аьлти-Юртара 17 шу даьнна кӏаьнк хилар. Ха ца кхачарга хьежжа, машин лалла бокъо луш дола каьхат цунга дацар, хӏаьта машин лалла пурам воккхагӏа волча вошас деннад цунна.
Полице болхлоша ӏочувигар наькъ тӏа михьарваьнна кхийстар. 18 шерга кхачанзачар гӏулакхех йолча инспекце учёте дӏаоттавергва из, иштта ший ханага хьежжа бехктокхаме а озаргва. Цул совгӏа, цо леладаьчох жоп дала оттабергба цун да, нана. Воӏ лерттӏа хьехам беш цакхеварах лоткъам оттабир даь цӏерах, каьхаташ доацача сагага машин дӏаенна вола воша а бехктокхаме озаргва. Машин, дӏаяьккха, гӏод тохача моттиге дӏаоттайир полице.
