Наьсаре Коталон Аллея тоае болабеннаб
Наьсаре дӏаболабир Коталон Аллея тоаяра болх - из лоархӏаме да ерригача республиканна, хӏана аьлча дагалоаттама, денала, Даьхенцарча безама моттиг я из. Аллея тоае лаьрхӏад «Вахара хьалаш» яхача кердача къаман проекта чуйоагӏаш, федеральни гранта чотах. Из грант елар Ерригроссийски зӏамагӏча шахьарашка, исторически юрташка дика хьалаш хьакхоллара проектий яхь дӏахьош котало яккхарах.
Хӏанз укхаза доладаьд кӏийле кийчъеш дола балхаш: тишъенна къаьнара тӏера ӏоакъа ӏойоаккхаш, архитектуран зӏамагӏа йола кеп дӏайоаккхаш, сердал оттаеш. Дӏахо дӏахьоргба керттера болх проектах боагӏача беса, бахархошта езача оагӏорахьа.
Проектаца да сийленгаш кердадахар; чувоалача латта моартолаш тоаяр; берий, спортивни майдаш кийчъяр; ӏи хургдола, сарахьа салаӏара моттигаш хьаяр; наькъа такилгаш дахкар. Коталон Аллея кердаяккхара хаттараш дийцар ветераний юкъарлонца дагабоалаш», - аьлар «Сердало» газетага Гӏалгӏайчен Паччахьалкхе.
Сийлахь-боккха Даьймехка тӏом лаьттача шерашка мах баь варгвоаца дакъа юкъедера Гӏалгӏайчено, тешшаме новкъостал лоаттадеш берригача мехка. Наьсаре цу хана эггара лоархӏаме тӏема юкъ яр. Моттигерча бахархоша цахаддаш ӏалашо йора Къулбехьа лаьттача тӏема ялатаца, кхачанца. Укхаза яр эвакуаци яра госпиталаш, юха мугӏаре овттар цига дарбаш даь салтий.
