Къахьегама гӏулакхаш гуччахьа леладара, тӏахьожам лоаттабе лерхӏ Наьсаре
Наьсарерча прокуратуре дӏайихьар, къахьегама оагӏонцара гӏулакхаш ӏаьдала бокъоно дӏадеххача тайпара хьаоттадара хетаяь кхетаче. Цига дакъа лоацаш хилар шахьара администраци, къахьегама гӏулакхех йола Паччахьалкхен инспекци, йоалах болча оагӏонцара болхлой, полици. Кхетачено белгалдаьчох, цу оагӏонцара болх, дӏадахача шера хинначунга хьежача, укх шера кӏеззига тоабеннаб ала йиш я. Къахьегама оагӏонца чӏоагӏо оттаяр шоашта аьттув болча тайпара дӏакхахьаро, бокъонах болх берашта доагӏаш дола хӏама дӏателарах кӏалхарбоах из гӏулакх лерттӏа лорадеш боаца болх лоаттабераш.
«ӏаьдала бокъоно дӏадеххача тайпара къахьегама оагӏонцара хӏама чӏоагӏдаь боацараш бехктокхаме озарах дийцар, къаьстта лакха терко еш. Прокуратуро лаьрхӏар цхьацца йолча, эггара хьалхарча аргӏагӏа цу оагӏонцара тӏахьожам бе безача моттигашка гӏолла болх дӏабахьа. Цу юкъе я гӏишлон балхех йола, хӏама йохка, иштта кхы а массехк моттиг. Болх лоаттаберашта, болх хьаберашта хьалхадаьккхар, шоай гӏулакхаш бокъоно дӏадеххача тайпара тоаде дезилга. Иштта цахиларо вахарцара, пенсионни оагӏонцара болх хила беззача тайпара хьаоттийтац»,- дийцар «Сердало» газетага мехкарча прокуратуре.
Теркалдаь кхоачамбоацараш меттадоаладара гӏулакха тӏахьожам беш хургба мехка. Хан-ханнахьа рейдаш дӏакхухьаш, бахархой хаттараш доашха массазара бувзам хьабийлла, иштта СМИ, вахара оагӏонашка гӏолла тӏатеӏӏа болх лоаттабеш тоаде лерхӏ цу оагӏонцара гӏулакхаш. Наьсарерча прокурора ше тӏахьожам лоаттабе лерхӏ цу балха.
