Кхувш боагӏарий гӏулакхех дийцар Наьсарен кхале
Барайтта шерга кхачанза долча берий гӏулакхех, цар бокъонех дувцаш; кхетаче дӏайихьар Наьсарен кхален администраце. Из хоам «Сердалога» бир цу моттигера.
Кхетаче гулбелар кхела доакъашхой, иштта администрацешкара, цу оагӏонцарча моттигашкара болхлой. Эггара хьалхарча оагӏонца теркалдир; кагирхошта, берашта юкъе цхьацца во гӏулакхаш цадаржийтара тӏехьа кхоачашде дезараш.
Цу балхах дувцаш къамаьл дир цига мехкарча дешареи ӏилмани гӏулакхех йолча Министерствон кулгалхочун гӏонча йолча Угурчанаькъан П., кагирхой гӏулакхех йолча Комитета хьалха латтача Пхьошанаькъан З.
Шоллагӏча оагӏонца дийцар бойлахьа дисача берий бокъонаш лораярах, дезала юкъе царна массахана терко лоаттаеш хиларах. Берашцара гӏулакх боаггӏача боараме хилийтара; царна новкъарле, хало йолаш хӏама цахилийтара тӏехьа массахана тӏахьожам хила безилга белгалдир кхетаче.
Цох лаьца къамаьл дир цига Наьсарен кхален администраце кулгалхочун гӏончас Исмейланаькъан Т., Илдарха-Гӏалий тӏарча администраце кулгалхочун гӏончас Йовлой Т., Шолжа кхален администраце кулгалхочун гӏончас Коазой А., Шолжа-Шахьарерча администраце кулгалхочун гӏончас Дзязганаькъан М.
Иштта кхетаче дийцар дӏадахача 2025-ча шера дӏабихьача цу оагӏонцарча балхах. Шахьарашка, юрташка цу лостамагӏа кхоачашде дезараш белгалдир гулбеннараша.
