Спорт йоаржаярах дийцар Наьсарен кхале
Спорт йоаржаярах дийцар Наьсарен кхале. Цох лаьца дувца спорта ишколай, ФОКий кулгалхошца кхетаче дӏайихьар кхален администрацена кулгал деча Овшанаькъан Мухарбика. Иштта цу къамаьла юкъе дакъа лоацаш хилар райсовета хьалха латта Эккажанаькъан Идрис, цун гӏонча Шоанахой Джабраил, АТК оагӏон кулгалхо Хьоашаланаькъан Ӏалихан, иштта кхыбараш.
«Гулбеннараша дийцар тахан ФОКашка, Наьсарен кхален ДЮСШ малагӏа болх лоаттабу, иштта спорт ма хулла йоаржаергйолаш малагӏа хувцамаш дича дика хургда. Овшанаькъан Мухарбика, массанега ладийгӏа, дӏахо кхоачашде деза декхараш белгалдир. Ала деза, Наьсарен кхален ФОКашкара, берий, кагирхой спорта ишколашкара спортсменаш тайп-тайпарча яхьашка толамаш доахаш, кхалера къонабараш спортаца бувзам болаш болга дӏахайташ хьабоагӏилга», - дийцар «Сердалога» Наьсарен кхален администраце зарбан болх лелабераша.
Спорта ишколашта кулгал дерашта хьалхашка латтача лоархӏамеча декхарех да, ма хулла кагирхой спорта юкъебоалабар, царна спорт езаялийтар. Лакха говзал йолча, хӏетта болалуш болча атлетий оагӏув хьаллоацаш дӏабахьа беза болх ба из. Начӏал долча берашта къаьстта чӏоагӏа терко е еза доккхача толамашка бугача наькъ тӏа дӏачӏоагӏбала, шоай хӏама тоаде.
