Хьехамчан Ди дездеш хилар Наьсарен кхале
Хьехамчанна, иштта берий бешамашка къахьегаш мел барашта хетаяь йоккха кхетаче дӏахьош хилар Ӏаьлий-Юртарча культуран Цӏагӏа. Эггара зӏамагӏа болча бахархошта нийса кхетам луш, дика гӏулакхаш царна хьалхадоахаш къахьегаш болча болхлошта доккха цӏай хилар цох.
«Гуш дар, берригаш цу цӏайца дог айденна болга. Гуйранцара цхьацца даараш оттадаь кийчо яьяр культуран Цӏагӏа дӏачувоаллача. Моажа бос бола ябакхаш, зизай кӏорапаш, къоахка гӏаьнаш массане бӏарг тӏаотташ хилар. Дега йӏовхал тела бос бола ӏажаш, йокъаенна буц гуйран денош лоацлуш латтилга белгалдеш яр. Юхасеца, царга хьежаш латта догдоагӏаш сурт дар из. Культуран Цӏен кулгалхо йолча Гӏаьнажанаькъан Мадинас хьаьшашка моаршал хоатташ къмаьл дир», - йоах «Сердалога» цу моттигера бенача хоамо.
Цу кхетаче бийха лоархӏаме хьаьший бар: Наьсарен кхален администрацена кулгал ду Овшанаькъан Мухарбик, Наьсарерча райсовета кулгалхо Эккажанаькъан Идрис. Шоай къамаьла юкъе цар белгалдир, берий бешамашка берашца къахьегаш болча хьехамчий болх мах баь варгвоацаш боккха болга.
Ӏаьлий-Юртарча, Сурхо тӏарча, Пхьилекъонгий-Юртарча берий бешамашка къахьегаш болча толашагӏа болча хьехамчашта Мехкадаьгара лерхӏаме грамоташ елар.
«Берий дуне», «Дошо дӏоагӏилг» яхача берий бешамашкарча тоабаша, Наьсарен кхален гимназерча, иштта Ӏаьлий-Юртарча культуран Цӏагӏарча бераша концерт гойтар гулбеннарашта. Хӏаране дега тоам беш кхетаче хилар ала деза цох. Тахан берашца къахьегаш, атта доаца декхараш кхоачашдеш хьабоагӏараш могаш, маьрша болаш, аьттонца, толамца шоай никъ дӏахобахьа даькъалабийцар кхетаче.
