Наьсарен кхалерча полице хьаяьхар 7,62 мм поатронаш
Гӏалгӏайчен Наьсарен кхале бокъонаш лораераша хьадаьхар къайлагӏа леладеш хинна тӏема гӏирсаш, яхъаш, дийцар «Сердало» газетага ГӏР МВД зарбан болх лелабераша.
«Наьсарен кхале гӏолла йолча Россе ОМВД лоткъам эцара отдела хьадийллача уголовни гӏулакхах 1д. 222 ст. РФ УК (тӏема гӏирсаш бокъо йоацаш леладар, дӏадалар, дӏа-юха дахьар), иштта «Герз» ОПМ чудоагӏаш Наьсарен кхале гӏолла йолча ОМВД болхлоша, ГӏР гӏолла йолча Россе МВД ВОГ чухьежар Наьсарен кхален Сурхо тӏарча вахархочоа, цига гучадаьлар, цӏагӏа латтача аьшкан сейфа чу 62 мм калибра герза поатронаш чуйолаш ши кӏопилг хилар, иштта топашца лелабу цхьаькха гӏирс а (ӏаьржа бос бола поатрон эккхийташ дола овра хьисапе аьшка дакъа)», - аьлар хоамо.
Цхьан кӏопилга чу 15 поатрон йоаллар «Сайга» яхача чарахьал дара йолча топаца лелаю, шоллагӏча кӏопилга чу - 7,62 мм калибра 19 автоматически герза поатронаш.
Карарча хана цу уголовни гӏулакхах бола тохкам дӏахо дӏахьош ба. Цу сага мехкара араваргвоацаш тешал деча каьхата кулг яздаьд.
Гӏалгӏай Республикан МВД цӏаькха а хьалхадоаккх сакхетаме хилар, бокъонах доацаш леладу герзаш полицега дӏадалар. Цу тайпара нийса никъ лелабеш вола хӏара саг зенах лоравергва; цул совгӏа, ахчанца новкъостал а дергда цунна.
