Наьсарен кхале полицейскеша наркотикаш хьаяхар, корта бохабу малар менна волча водителгара
Буро кӏалха патрульно-постовой гӏулакха болхлоша, Наьсарен кхале гӏолла йолча Россе ОМВД Госавтоинспекце соцайир ВАЗ-2114 автомобиль. Цу машина водитель корта бохабу малар менна хилар гуш дар. Дӏахо из хьал кхы а чӏоагӏагӏа дегӏадера.
«Закон лорадераша водитель транспорта тӏара ӏоваьккхар, цунна духьала лоткъамаш кийчдир РФ КоАП 2 д. 12.26 ст., 3 д. 12.37ст., 2 д. 12.3 ст.
Цул тӏехьагӏа цу машина чу ваьгӏача сага аьрда кога тӏа ювхача носке чура ӏажагӏа каьхат тӏадоаллаш цхьа хьоарчаяь хӏама корайир, из хьаяьстача чухьнахьа пхи эзар сома каьхата лич боаллар, иштта мефедрон молха а йоаллар 2,55 гр (Гӏалгӏайче гӏолла йолча МВД Экспертно-криминалистически центра говзанчас яхачох).
Машина чу ваьгӏа саг полице дӏавигар Наьсарен кхале гӏолла йолча Россе ОМВД. Из вахача моттиге чухьежар. Цунгара лелае бокъо йоаца хӏама кораянзар», - аьлар «Сердало» газетага Гӏалгӏайчен МВД зарбан болх лелабераша.
Носке чу наркотикаш лочкъаяь хинна саг административни бехктокхаме оттавир лелае бокъо луш йоаца молхаш цунгара хьалацарах (ст. 6.9 КоАП РФ). Цул совгӏа цунна духьала уголовни гӏулакх хьадийллар цо наркотикаш лелаярах ( РФ УК 2 д. 228 ст.). Из саг хӏанзарчоа нах лаьца боахкача моттиге чувоалл.
